Search for Me

Saturday 25 August 2012

Matalinong Bata

Isang araw, may batang gutom na gutom na nakatambay sa kanto. May dumaang naglalako.

Manong, manong ano bang meron dyan?

Madami akong dala ngayon. Bagong luto lahat to ser. Maruya, turon, banana que, kamote que, tokneneng tsaka Lumpiang toge.


Magkano po tong banana que?

otso nalang

Ang mahal, etong tokneneng?

otso din po.

Ang mahal din. Eh etong turon?

otso din po, sir. Pag dalawa binili mo, disi-sais nalang.

Ha? Niloloko mo ba ko manong? Puro otso 'tong tinda mo eh. Anong pinaka-mahal?

Eto pong kamote que ser. Sampu.

Ayun! Yun naman pala eh. Bigyan mo ko nung pinaka mura. hehe

Sais isa nitong Lumpia ser. Ilan ba?

Tatlo bibilhin ko oh. Kinse nalang manong. 

Luge naman ako ser, Disi-otso nalang lahat ser. Libre na suka.

Niloloko mo talaga ko manong no? Eh talaga namang libre suka eh. Di mo ko pedeng gulangan. Haaa. Valedictorian ata 'to nung highschool!

Eh luge naman kase ser.

Tatlo naman bibilhin ko eh. Sixteen fifty? Huling tawad na. Sige na manong.

Lugi talaga ser eh.
Pero dahil mabait ka tsaka gwapo. sige na nga, ibibigay ko na sa'yo tatlo - bente nalang. Libre suka tsaka sibuyas. 

*Nag-isip ng mga isang segundo ang Bata

Sige! Madali ka naman palang kausap manong ehh. hehe tenkyu ha? Keep the change. Hahahaha!

*Nag-abot ng bente tsaka dali-daling lumayo*

Sure Iho! Goodluck din sa pag-aaral mo! 




*WARNING: DON'T LAUGH! THIS IS A TRUE STORY"

Wednesday 22 August 2012

Masarap magkaroon ng Boyfriend

Masarap magkaroon ng Boyfriend;


  • Na makulit, mapang-asar, at mapagbiro. Pero seryoso sa relasyon n'yo at nagpaplano para sa hinaharap niyo.
  • Na tinuturing kang isa sa pinaka-matalik nyang kaibigan pero minamahal ka higit pa sa kaibigan.
  • Na tumatawa sa mga jowks mong korni at sumasakay sa mga kakaibang trip mo sa buhay.
  • Na sasamang manunuod ng concert ni Lady Gaga kasama ka. 
  • Na sasamahan kang manuod ng sine at mag window shopping maghapon kahit na sumakit ang paa n'ya kakaikot sa SM Mall of Asia o kahit bagot na bagot sya sa Twilight Saga.
  • Na aaray kahit sa mga kurot at palo mo, kahit hindi masakit.
  • Yung makikipag-kaibigan sa mga kaibigan mo kahit di niya trip ang ilan sa barkada mo.
  • Yung paplastikin ka at sasabihan nang SEXY, kahit alam mo sa sarili mong HINDI naman talaga.
  • Na nanakawan ka ng halik at biglang yayakapin sa harap ng madaming tao.
  • Na itetext ka kung kumain ka na ba? Kung nakatae ka ba o  kakamustahin ang araw mo. Mag-goo-goodnight, Goodmorning, ingat ka, muah muah at tsup tsup.
  • Na lilingon sa mga sexing babae na dadaan pero sasabihan kang "Sexy s'ya, pero mas sexy at maganda ka pa din"
  • Na ipagluluto ka at ipaghahain kahit ang alam lang n'yang iluto ay nilagang itlog at Pancit Canton.
  • Na hindi sasabay sa init ng ulo mo. At hihingi ng sorry kahit di n'ya kasalanan.
  • Na yayakapin ka kapag depressed ka o naiiyak dahil may nangaway sa'yo.
  • Na magseselos sa bokalista ng Callalily.
  • Na sasakay sa mga kalokohang pilit mong pinapagawa sa kanya (ie: mag bakla-baklaan)
  • Aalalayan ka, makikipag HHWW, at ililibre sa mga kainan kahit taghirap din s'ya.
  • Na isasama ka para manuod ng laro nila sa Basketball.
  • Na araw-araw sasabihin at ipapadama sa'yo kung ga'no ka n'ya kamahal at ikaw ang nag-iisang Prinsesa sa buhay n'ya.
  • Yung ngangawa sa'yo with matching tulo ng sipon para lang mapatawad mo sa kalokohang nagawa n'ya.
  • Yung magsasabi sa'yong 

"Ang ganda ng langit 'no? Kaso nakakangawit tumingala. Buti nalang andyan ka, isang sulyap ko lang, LANGIT na."



*Marami-rami pa naman silang ganyan. Mga 249 pa silang natitira sa buong mundo. Dati 250 ehh. Dalian mo lang sa paghahanap dahil nagkakaubusan na. Kapag nakakita ka, wag mo nang pakawalan. Itali mo sa leeg at i-lock mo. Tapos itapon mo yung susi sa inodoro tsaka mo i-flush. Ting! Bongga!


*Masarap sanang magkaroon ng ganyang boyfriend, lalo na kung babae ako. Kaso hindi eh. Kaya girlfriend ang hahanapin ko.


Warning: Obscene Words Found

Nainis akong bigla dahil sa isang napaka-walang modo at tang*ng komento ng isang ka-chatmate (babae, ngunit hindi naman ka-close). Hindi ko alam kung sinasadya n'ya, kung dala ng kamangmangan (clue: marunong din naman s'yang magbasa, magsulat, at gumamit ng facebook), o sadyang matubig lang talaga ang ulo n'ya. 

Nangyari isang araw na nagcha-chat kami sa isang Social networking site na itatago nalang natin sa pangalang, T_____.com™. 


"Balita ko may blogsite ka daw ah?!"
"oo, ibibigay ko link sa'yo." - Copy + Paste link
*basa,basa,comprehend*
"okay ahhh. hehehe eto, meron din ako, try mo basahin din"
-copy + paste link
"ayy, tagalog??" - *log out*

Napakurap lang ako at hindi na nakapagsalita. Naiwan akong speechless habang nakikipagkurapan sa nagbi-blink na mouse cursor. Tan**na. Badtrip yun ahh. 


Hindi ako nabadtrip dahil sa hindi n'ya pag bibigay pansin o pag snob sa mga entry kong walang kalatuy-latoy. Ang kinabad tripan ko lang naman eh yung harapan at bastusang halos pagsasabing "Hindi ako interesado sa Blog mo kasi nakasulat sa FILIPINO". Hindi n'ya sinabi sa muka ko pero halos ganon na din yun. Nakasulat sa Ingles ang blog n'ya at feeling n'ya siguro ang tali-talino at ang cool cool n'ya. At ang pagbabasa ng blog na tulad ng blog ko eh sadyang nakakabobo at nakakaubos ng oras n'ya. Booyset. May mga tao talaga na tang*. Hindi ko parin lubos maisip na sa panahong ito ay may mga tao padin palang mababa ang tingin sa sariling wika. Kailangan ba pag gagawa ka ng entry sa Blogspot eh nasa Ingles? Mas makakaramdam ka ba ng self-satisfaction kapag nasabi mo ang mga gusto mong sabihin sa salitang banyaga? Kapag nakapag-kwento ka ng mga excapades mo sa salitang Griyego? O Naikwento mong nalasing ka sa Gerry's grill sa salitang Pranses? Kapag nagmura ba ko sa salitang Nihonggo, mas cool ako kesa magmura sa salitang Filipino?

Hindi ako nagsusulat ng English na entry kasi ayoko(Bukod sa naglalaway ako kapag nasobrahan ng kaka-ingles). Kaya lang naman ako nag Blog para masabi ang mga salitang hindi ko masabi nang walang iniinom na kape. Kelangan kong ipagsigawan sa madlang people ang mga bagay na gumugulo o tumatakbo sa isip ko kapag nahihirapan akong matulog. Kapag ang diwa ko ay ginigising ng libo-libong kataga na ayaw lumabas tulad ng taeng nahihiyang lumabas pag bago ang nauupuang arinola. Wala na akong gustong patunayan. Pero marami akong gustong sabihin. At ang pagbo-blog ang nakita kong pinaka mabilis na paraan para masabi ang mga gusto kong idaldal. O isuka ang mga letrang nakain sa maghapong pakikipag ututang dila sa aso ng kapitbahay na kahol ng kahol.

Nagpanting ang tenga ko at hindi ko sya mai-chat para makompronta. Ang tanging hiling ko nalang;
Sana mabuhay si Andres Bonifacio at habulin ka ng itak.

Sabagay, masarap ding ilabas ang sama ng loob sa salitang Ingles. "You pissed me off. And I like you for that. So, here's for you. Special delivery with love. Fu*k YOU!!"

Pakiusap lang, hindi ka magmumukang matalino dahil lang sa kaya mong magsalita ng derederetsong Ingles sa pusang-galang Blogsite mo. Subukan mo munang i-evaluate ang;

                         2 sinx - sin 2x
                 Lim    -----------------
                x = 0       x - sin x
                                     
baka maniwala pa ko sa'yo.

*Sorry for the inconvenience that we are. Slow Men at work.*



Friday 17 August 2012

Hipon o Loliipop?

Nitong mga nakaraang buwan, habang ako ay sumasailalim sa matinding depression stage, gumawa ako ng account sa isang social networking site. Anong trip? Makipagkaibigan sa lahat ng pwede, makipag chat sa lahat ng online, nang HINDI nag-uupload ng kahit anong photo maliban sa mga cartoons at mga larawang walang kinalaman sa itsura ko o kung sino man ako.

Anong nangyari at nalaman ko sa mahigit na apat na buwang pagninilay-nilay? Madami-dami naman. 

Karamihan talaga sa mga tao, hindi makikipag kaibigan/chat sa'yo kung wala kang mukha. Para bang ang lahat ay nakasalalay sa kung anong itsura mo bago ka nila pagtuunan ng pansin. Yan ang kalimitang katotohanan. Hindi naman palagi pero yan ang madalas na senaryo.
Tipong, "hi there, do you believe in love-at-first-sight?"
Makikita at babasahin ang message mo, sisilipin ang profile mo at mga albums. At dahil wala ka namang picture
"heh! Shut up assho*e!!*
Hindi ka nila papansinin. Lalaitin. Pagmamalupitan. Pagbubuhatan ng kamay. Ansaklap.
Yung iba naman dahil cool ka sa umpisa ng chat mo at sa mga post mong kakornihan, pagtatyagaan ka. Pero anong mangyayari pagtapos ng isa o dalawang araw na kayo eh nagkaka-chat na? 
Mismo! Manghihingi sila ng picture mo para ma-imagine o magkadetalye kung ang ka-chat ba nila eh kahawig ni Dante Balboa o isang one-eyed monster na kulay green. Pero marunong mag-type.

Naitanong ko na ito dati at uulitin ko lang, mahalaga ba talaga na maimagine mo kung anong hilatsa ng mukha ng kausap mo? Sinabi ko nang hindi ako gwapito o papabol pero nagpumilit ka pading makita ang ebidensya. Na-realize mong isa ako sa pinaka-honest na taong nakilala mo. Pinaka-honest lang talaga. Yun lang.
Anong magagawa mo kung pagkatapos mong mag-enjoy na ka-chat s'ya, nakita mong mukha pala s'yang Gorilla? Oo, mukang Gorilla. Natakot ka kasi hindi mo malaman kung ang nakikita mo ba ay mukha ng tao o kili-kiling magubat. Magpapatuloy ka pa ba sa pakikipagkaibigan sa kanya dahil enjoy s'yang ka-chat at dahil may sense s'yang kausap? O maghahanap ka ng ibang makaka-chat na mas may itsura nga pero malabnaw pa sa lugaw ang utak at puro hangin lang ang kayang ibuga? Bukod pa dyan ang isang libo't isandaan n'yang walang kaepek-epek na mga jowks. Mga panahon pa ni Mahatma. Mag-iiba kaya ang tingin mo sa kanya? Tingin ko, mag-iiba. Nalaman ko, dahil naranasan ko.

Nakakaloko lang talaga ang ibang tao, nagiging basehan ng kung sino ang dapat nyang kaibiganin depende sa kung ano ang tabas ng mukha ng kausap nya. Choosy pa! Akala mo naman. Hindi ko naman sinabing huwag mamili ng tipo ng kakaibiganin pero sana, mabawasan lang yung pagiging choosy. Give chance to others 'ika nga.

Sa totoo lang, hindi ako tumitingin sa itsura ng tao kapag nakikipagkaibigan. Wapakels ako dyan. Karamihan ng kaibigan ko eh may mga itsurang katamtaman lang. Hindi papable at hindi din naman mukang nakuyog ng bubuyog. Yung tipong hindi pang model ng Johnson's baby powder o pang liha ng kahoy. Yung sakto lang. May iba na medyo below average pero ayus lang din. Masarap silang kasama dahil wala silang kaere-ere sa katawan at walang dull moments. Hindi ko naman sila naging ka-close noong una, pero dahil naging kampante ako sa ugali nila at halos pareparehas ang trip naming kainin nung mga panahong yun, naging mga matalik ko silang mga kaibigan. Kinalaunan, nasanay din ako. Sanayan lang naman din yan. Jowk.

Tingin ko nga mas madaling maging ka-close ang mga taong wala kang ideya kung anong itsura. Atsaka may thrill eh. Binabase mo na lang kasi yung magiging "verdict" mo kung papasa sya bilang kaibigan, lover, o kabit mo, sa ugali, jokes at mga pananaw n'ya sa buhay. Hindi dahil magaling syang magsuot ng sleeveless, kita parati ang nangungusap na cleavage o dahil kamuka nya lang si Solenn Heusaff. 

Sa huli, desisyon mo parin yan. Ikaw yan eh. Basta ang ayoko lang, yung hihingan mo ako ng picture dito o kung saan mang social networking site. Mahirap na at baka madiscover pa ako. Tinago-tago ko pa naman lahat ng talents ko. Wala tuloy akong mailabas. Atsaka, malay ko ba kung ipapakidnap mo ako o ipapakulam sa suki mong albularyo. Aba, mahirap na. Pero kung ipapadala mo yan sa ABS-CBN, ibang usapan yan. Marami pa ko ditong 1x1 pictures na whole body. Spare copies na.

Oh ngayon, ano nang problema ko? Wala. Ikaw ba? Ano ba kasing trip mo? 

Hipon?









O Lollipop?












*NONSENSE* MWEHEHEHEHEH.


Saturday 4 August 2012

Itanong KO sa Akin

Minsan ba, dumating ka na sa punto ng buhay mo na wala kang magawa kaya pati sarili mo, tinatanong mo nalang ng kung anu-anong bagay? Maaaring mga bagay na may sense, maaaring wala.
Wala eh, bagot na bagot ka na kasi. At dahil dyan, napag-isip isip kong tanungin na lang ang ilang mga bagay na gusto kong itanong sa sarili ko na syempre ako din ang sasagot. Oh diba, ang exciting? Wala lang, we are on the process of getting to know each other eh. 

Dalawampung tanong na may dalampu't-isang sagot

FAQ me:

1. Ano ang pinagkaka-abalahan mo ngayon?
  • Hindi ko gusto yang tanong mong yan. Pero kasalukuyan akong nagpapaka-busy sa pagsagot ng walang kwenta mong tanong, pag cocompute, pagdodrawing, pagsagot sa telepono at pagpapak ng kettle corn popcorn.
2. Ano ba ang trabaho mo?
  • Madami akong trabaho sa ngayon. Isa akong telephone operator/utility man/liason officer/quantity surveyor/DJ/lover/assistant to the assistant to the assistant to the assistant of Project Manager. Pero isa akong Civil Engineer in profession. 
3. Sa tingin mo, kung hindi ka Civil Engineer ngayon, ano ka pala?
  • Wow! Very interesting question. Siguro kung hindi ako naging engineer, baka naging isa akong Astronaut. Mahilig ako sa Science nung bata at trip kong mag time travel. Pero dahil mahal mag-aral ng Space Engineering and time travelling so, ok na ko sa pagiging Engineer ko.
4. Kung magiging halaman ka, anong gusto mong maging at bakit?
  • Talaga naman. Parang pang Miss Universe ang mga tanungang ganito ahh. Kung magiging halaman ako, gusto kong maging CACTUS. Dahil ang CACTUS ay MATINIK. 
5. Bukod sa pag-inom paminsan-minsan, ano pa ang matatawag mong bisyo mo sa buhay?
  • HAHAHA. Hindi ako mahilig uminom. Chismis lang yun. Ang totoong bisyo ko eh ang pagkaskas ng paa ko sa blueng kulambo. Hindi ko kayang mabuhay ng walang kulambong kasama. 
6. Weird ka.. Siguro wala kang girlfriend ngayon. Ano ang pamantayan mo sa pagpili ng magiging girlfriend mo?
7. Mahusay kang sumagot at talagang bibo. Mukang napaghandaan mo 'to ng maayos ah.
  • Huwag kang mambintang! Ang lahat ng mga tanong at sagot na mababasa mo dito ay pawang impromptu. Hindi ko lang sigurado kung tama ba ang spelling ko ng IMPROMPTU.
8. OWSSS?? Naniniwala ka ba na ang mga lahat ng tao ay nanggaling sa UNGGOY?
  • Edi wag kang maniwala. pekyu! Hindi ko lang alam sa pamilya mo ha, pero hindi ako naniniwala dyan. Mas naniniwala pa 'kong ang lahat ng tao ay nanggaling sa bulaklak ng LOTUS.
9. Bulaklak ng LOTUS?? Sira ba ang ulo mo?
  • Hindi! Seryoso ako dyan. Wala lang. Kanya-kanyang trip yan brod. Walang basagan ng trip. Kung gusto mong maniwala na nanggaling ka sa unggoy, wala naman akong magagawa dyan.
10. May gusto ka bang itanong sa akin?
  • WALA!! Anlakas ng tama mo ah. Ano ako, praning???
11. Okay fine. Ikaw naman, di ka na mabiro. Oh eto, medyo challenging, WHAT IS LOVE? HAHAHAH Patay ka dyan!!
  • Naknampu******. Iyan ang mga tanong. Okay game. Ang LOVE ay isang pakiramdam na nararamdaman ng isang tao. Hindi nakikita pero kailangan mong ipakita. Hindi nakakain pero nakakabusog ng pagkatao. Ito ay iyong pagkakataon na para kang sinasaniban ni Balagtas at magpapaka-korni. Susulat ng tula para sa mahal mo. Manliligaw, magbibigay ng bulaklak at tsokolate kasehodang walang matirang pambaon. Sumasaya ka sa piling ng isang tao. Palagi syang dumadalaw sa panaginip mo. Lagi kang matutulala at mapapangiti. Nakakaramdam ng security sa tabi nya, ng kakuntentuhan sa buhay, ng isang uri ng inner peace o isang di maipaliwanag na enjoyment. Mahirap sukatin ang salitang yan at bigyan ng kahulugan. Ikaw lang ang makakapag sabi kung in-love ka at lalong ikaw lang ang makakapag bigay ng kahulugan.
12. Masyado kang seryoso. Love is BLIND lang ang alam ko tapos ikaw ang dami mong alam. Talaga bang hindi mo pinaghandaan ang interview na 'to??
  • Ang kulit mo! Para kang AKO ah!! Ayokong sagutin ang tanong mo. PASS!!! 
13. Wow, suplado. Parang ako lang. Tingin ko magkakasundo tayo. Anong peborit mong food?
  • hahahaha! Oo nga eh. Hmm.. Food. Depende sa mood ko. Mahilig ako sa gulay o kung anong luto ng manok o baboy. Adobo, sinigang na buto-buto, sisig o kaya eh mga inihaw na isda o barbeque. Mahilig din ako sa tapsilog o kaya eh tuyo at itlog lalo na sa umaga.
14. Grabe! Napaka-compatible talaga natin. Pati pagkain halos parehas tayo ng gusto. Ayaw mo din ba ng ATAY, SHELLS, LAMANG-LOOB, BALOT, KAMBING, at iba pang exotic foods? Tsaka mahilig ka sa maanghang??
  • Tama ka dyan! Coz, I'm HOT!! Talagang compatible tayo. Feeling ko crush na kita. Ayoko ng mga pagkaing yan. At ayoko ng mga pagkaing hindi ko gusto ang itsura. Maarte ako sa pagkain.
15. Anong mga hobbies mo? Baka sakaling parehas padin tayo.
  • Ang maglaro ng basketball, mag laro ng video games, mag drawing, magsulat, magbasa, maglakbay gamit ang bike, matulog, kumain, matulog at mag pagulong-gulong.
16. Yun lang! Di tayo parehas dyan. Di na 'ko nakakalaro ng videogames ngayon tsaka hindi ako mahilig mag pagulong-gulong.
  • Oh eh anong pakelam ko naman sa'yo? Akala ko ba magtatanong ka lang? Bakit ka nagkekwento? Nang-aagaw ka ng moment ehhh.
17. Ay sorry, sorry. Di ko naman sadya. Are you an Anti-RH or PRO-RH?
  • Katulad ng stand ko parin noon, suportado ko ang RH-bill at ang responsableng paggamit ng kalayaan para sa tamang pagpapamilya. Sa panahong lumulobo na ang populasyon ng Pilipinas, nararapat lang na tugunan natin ang lumalalang problema at ang mga kaakibat na mas malaking problemang dala ng kamangmangan at saradong isipan. Hindi magandang masarapan ng isang gabi at magdusa nang ilang dekada. Buti ba sana kung ikaw lang ang magdudusa. MABUHAY ang PILIPINAS!!!
18. MABUHAY!! TEKA, may duda ko sayo ahh. MANYAKIS ka no???
  • Pag pro-RH, manyakis na agad???? PASS..

19. HAHAHAHA! Mayroon ka bang mensahe para sa mga kabataang nagbabasa ngayon nito?
  • Mga bata, huwag tutularan ang ginagawa kong ito. Humingi ng ekspertong payo galing sa mga nakakatanda ukol sa pinagbabawal na gamot at huwag kalimutang tumawag sa Diyos lalo na kapag matindi na ang pinagdadaanan mo, hindi yung kung anu-ano ang bigla mong pinagtitripang gawin nalang. Pagbutihin ang pag-aaral at wag papabayaan ang kalusugan. Kumain ng kalabasa para luminaw ang mata. At higit sa lahat huwag masyadong maging gahaman sa pag online sa mga social networking sites. I, thank you!
20. Okay, last na. Palagay mo, bakit may mga taong gumagawa ng ganitong klaseng trip sa buhay nila?
  • Dahil katulad ko, maraming tao ang nababagot, nalulumbay at inaantok sa mundong ito. At hindi kayang tanggalin ng kape ang antok ko.

  • 3.141592654!!! 
     HAHAHAHAHAHA Diba value ng PI ang itatanong mo sakin? Ang galing ko!! YESSSSSSS!!!!!!!

*napalunok ako*